Сүүлд шинэчлэгдсэн: Өчигдөр 15 цаг 1 минут
Ихрүүд Ерөнхийлөгчийн үзгээр бичнэ



Сэтгүүлч миний бие “Үндэсний шуудан” сонинд ажиллаж байхдаа дөрөв төрөхдөө дандаа ихэрлэсэн ховорхон заяатай нэгэн гэр бүлд байр олгохыг хүссэн нийтлэлээ өнгөрсөн аравдугаар сарын 3-нд бичсэн юм. Араас нь редакцын хамт олон бодлогоор дэмжиж, олон сайн хүмүүсийн дэмээр арван ам бүлтэй Б.Энхтөрийнх өнөөдөр XXI хорооллын гурван өрөө сууцанд сэтгэл тэнүүн сайхан амьдарч байна. Тэднийхийг байртай болгох санал дэвшүүлсэн нийтлэлийн дараа Ерөнхийлөгч Ц.Элбэгдорж, тухайн үеийн Ерөнхий сайд Н.Алтанхуяг, хотын дарга Э.Бат-Үүл нар их санаа тавьсан, тусалсан. Гэхдээ л эмэгтэй хүний торгон мэдрэмж байсан уу, илүү их сэтгэл гаргасан нь тэргүүн хатагтай Х.Болормаа юм. Б.Энхтөрийнх ч тэргүүн хатагтайн зүтгэлийг онцгойлон үздэг учраас Ерөнхийлөгчийн гэр бүлтэй уулзаж талархлаа илэрхийлэх хүсэлтийг анх нийтлэл бичсэн гэдэг утгаар нь сэтгүүлч надад хэдэнтээ дайсан юм. Хэвлэлийн албанд нь дамжуулахаас өөр холбоогүй надад өнгөрсөн бямба гаригт хариу ирлээ.



-Ерөнхийлөгч, тэргүүн хатагтай хоёр ихрүүдийн хамт маргааш өдрийн хоол иднэ, та ирээрэй гэв. Харин энэ мэдээг Ерөнхийлөгч өөрөө хэлсэн үү, хэвлэлийн алба нь тэгж үзсэн үү, “хэвлэлийнхэн хэрэггүй” гэсэн “муу мэдээ” бас дагажээ.

Маргааш нь товлосон цагтаа очиход Ерөнхийлөгч Ц.Элбэгдоржийн гэр бүлээс гадна манай зочид болох Б.Энхтөр, түүний гэргий Ц.Ундрах, хоёроороо ихэрлэсэн тэдний найман хүүхэд, бас “Болор” сангийн хүүхдүүд нь иржээ. Тэнд мэдээж, улстөрийн яриа болоогүй. Өнөр хоёр бүлийн халуун дулаан уулзалт болов. Өөрийнх нь хүүхдүүд, Болор сангийн 20 гаруй, бас Б.Энхтөрийн найм гээд ёстой л хүүхэд шуугисан “хонины найр”-ан дунд Ерөнхийлөгч эмэгтэйчүүдэд баяр хүргэж, өөрийнхөө төрсөн өдрийг тэмдэглэв. Сангийнх нь хүүхдүүд Ерөнхийлөгчийг Амбаа гэж дуудах бөгөөд Март гэж тэргүүн хатагтайд, төрсөн өдөр нь гэж Ц.Элбэгдоржид бүгд л өөрийн хийсэн гар урлалын бүтээлийг бэлэглэж харагдав. Тэд жил бүрийн энэ өдрийг ийм өргөн бүрэлдэхүүнтэй тэмдэглэдэг бөгөөд энэ удаа харин Б.Энхтөрийнх нэмэгдсэнээрээ их сонирхолтой байгаа бололтой. Хамгийн том ихэр нь аль юм бэ, гурав дахь ихрүүд нь сургуульд орсон юм уу, одоо дахиад төрвөл бас ихэр гарах болов уу, тэгвэл арван хоёулаа илүү сайхан юм биш үү гэх энгийн яриа энэ тэндгүй өрнөнө. Харин ширээний ард, хэвлэлээс харвал эхнэр л голдуу яриад байгаа харагдах юм, одоо нөхөр жаахан ярь л даа, та хоёр маань аль нутгийнх вэ, анх яаж танилцсан юм, анхны ихэрээ хэзээ төрүүлсэн бэ гэх зэргээр Ерөнхийлөгч асууна. Асуулт бүрийн хариуг Б.Энхтөр товч өгч, эхнэр Ц.Ундрах нь дэлгэрүүлж инээдэм болно.

Сүүлд нэмэгдсэн
Зохиогчийн эрх хуулиар хамгаалагдсан. Мэдээлэл хуулбарлах хориотой.
Монголын шилдэг нийтлэлчдийн клубын гишүүд нь редакцийн бодлогоор ажилладаггүй тул
аливаа нийтлэл, түүнтэй холбогдон гарах асуудлыг тухайн нийтлэлч бүрэн хариуцна.